Transportuan 10 emigrantë të paligjshëm, tre persona në pranga

Policia e Shtetit bëri me dije përmes një njoftimi në Facebook se në kuadër të operacionit policor “Perimetri” janë goditur dy raste të tjera të veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit.

Tre shtetas janë vënë në pranga pasi janë kapur duke transportuar 10 emigrantë të paligjshëm.

Sipas burimeve policore dy prej të arrestuarve, gjatë ndjekjes nuk iu bindën urdhrit të punonjësve të Policisë, por u kapën dhe ndaluan.

Abigel Kola, 29 vjeç, banues në Divjakë.

“Shtetasi i mësipërm është konstatuar në afërsi të vendit të quajtur “Kryqëzimi i Libonikut”, Maliq, nga shërbimet e Policisë, duke drejtuar mjetin tip “Volkswagen”, të cilët i kanë bërë me shenjë të ndalonte, por Kola nuk i është bindur urdhrit të tyre për të ndaluar. Pasi janë vënë në ndjekje dhe bënë të mundur ndalimin e tij, gjatë kontrollit që forcat e Policisë ushtruan në mjetin e 29-vjeçarit, gjetën tre emigrantë të paligjshëm, të cilëve kundrejt fitimit, ky shtetas iu kishte premtuar kalimin drejt vendeve të BE-së”,- thuhet në deklaratën e policisë.

Gjithashtu u arrestuan shtetasja Fatjona Vuçaj, 25 vjeçe, banuese në Durrës dhe shtetasi Dhimitri Beba, 24 vjeç, banues në Tiranë.