Protestuan ndaj deklaratës së Lajçak, policia arreston dy aktivistë të PSD-së

Policia e Kosovës arrestoi të premten dy aktivistët e Partisë Socialdemokrate, Frashër Krasniqin dhe Zgjim Hysenaj, gjatë një aksioni simbolik që ata mbajtën pranë zyrës së BE-së në Prishtinë.

Ata janë arrestuar për shkak te mbishkrimeve që kanë vënë në mure. Me këtë aksion, ata kundërshtuan deklaratat e të dërguarit të posaçëm të BE-së, Miroslav Lajçak, të bëra në Beograd, sipas të cilit Kosova duhet të ndryshojë Kushtetutën për krijim të Asociacionit të Komunave me shumicë Serbe.

Me moton “Evropa po ndan njerëzit”, anëtarë të PSD-së thanë se Miroslav Lajçak, është neutral karshi pavarësisë së Kosovës dhe BE-ja po e luan një rol problematik dhe po i ndan popujt dhe njerëzit. Ndaj veprimit të policisë, reagoi Dardan Molliqaj, kryetar i PSD-së.

Sipas tij, është i papranueshëm veprimi i Policisë së Kosovës, andaj ai kërkoi lirimin e tyre të menjëhershëm.