“Unë jam mësues”, me qindra qytetarë marshojnë në Francë në nder të mësuesit të vrarë

Masat anti- COVID  nuk i ndalën francezët të mbrojnë lirinë e shprehjes.

Me mijëra njerëz u mblodhën në sheshet kryesore të qyteteve franceze për të marrë pjesë në marshimet organizuar të nder të mësuesit Samule Paty.

Mësuesi u vra në mënyrë makabre të premten e 16 tetorit pasi u tregoi nxënësve të tij karikaturat e Profetit Muhamed.

Nga Parisi në Lyon, Marsejë dhe Lille turma të mëdha qytetarësh  u mblodhën në heshtje, duke ndalur herë pas here për të duartrokitur. 

Ata jo vetëm heshtën disa minuta por edhe kënduan himnin kombëtar.

Kryeministri Jean Castex ndoqi marshimet në Sheshin e Republikës në Paris me Ministrin e Arsimit Jean-Michel Blanquer dhe politikanë nga i gjithë spektri, duke u solidarizuar pas vrasjes që tronditi vendin.

Qytetarët që morën pjesë në marshim mbanin në duar tabela ku shkruhej “Unë jam mësues”.

“Ne jemi këtu për të mbrojtur Republikën, vlerat e Republikës: lirinë, barazinë, vëllazërinë dhe sekularizmin. Ne ndiejmë se kombi është i kërcënuar”,- u shpreh Pierre Fourniou, një prej pjesëmarrësve në marshim.

 “Mësimdhënia është një nga profesionet më të rëndësishme. Çdo gjë varet tek edukimi, nuk janë politikanët ata që ndryshojnë gjërat, është edukimi i fëmijëve.  Bota nuk mund të vijojë të jetë siç është”,- tha Antoine Carrillo, një tjetër pjesëmarrës.

Mësuesi 47- vjeçar Samuel Paty, u vra jashtë shkollës së tij në periferi të Parisit nga një agresor 18-vjeçar.

Në fillim të këtij muaji, mësuesi u kishte treguar nxënësve të tij karikaturat e Profetit Muhamed duke zemëruar disa prej prindërve myslimanë.

Myslimanët besojnë se çdo përshkrim i Profetit është blasfemi.

Autori  i cili kishte lindur në Rusi nga Çeçenia, u qëllua për vdekje nga policia menjëherë pas sulmit.

Policia ka ndaluar 11 persona në lidhje me vrasjen ndërsa presidenti Macron e cilësoi sulm terrorist islamik.