Zotëronte armë dhe radio si të policisë, arrestohet 24-vjeçari

Një 24-vjeçar është arrestuar nga policia e Shkodrës pasi gjatë kontrollit në banesën e tij, shërbimet e Policisë kanë gjetur dhe kanë sekuestruar 2 armë zjarri pushkë, municion luftarak dhe 2 radio si të Policisë.

Ndaj 24-vjeçarit me inicialet J. K., banues në fshatin Domen, Shkodër, rëndojnë tashmë veprat penale “Mbajtja pa leje dhe prodhimi i armëve, armëve shpërthyese dhe i municionit”.

Materialet në ngarkim të tij i kaluan prokurorisë për veprime të mëtejshme.

“Në zbatim të planit operacional të hartuar në fillim të janarit, me qëllim mbajtjen nën kontroll të situatës kriminale dhe të shtetasve me precedent të theksuar kriminal, si dhe për kapjen e atyre që mbajnë apo qarkullojnë me armë zjarri, drogë dhe sende të tjera të kundërligjshme, bazuar dhe në inteligjencën informative, shërbimet e Komisariatit të Policisë Shkodër dhe strukturat hetimore të Drejtorisë Vendore të Policisë Shkodër, organizuan dhe finalizuan operacionin policor të koduar “Postriba”.

Në kuadër të këtij operacioni, u kap dhe u vu në pranga shtetasi J. K., 24 vjeç, banues në fshatin Domen, Shkodër, për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Gjatë kontrollit në banesën e 24-vjeçarit, shërbimet e Policisë gjetën dhe sekuestruan në cilësinë e provës materiale, 2 armë zjarri pushkë, municion luftarak dhe 2 radio si të Policisë”, thueht në njoftimin e policisë.