Kryeministri i Kosovës Hoti sqaron tre shkarkimet në tatime, doganë dhe polici

Kryeministri i Kosovës, Avdullah Hoti ka dalë përpara mediave të mërkurën, duke argumentuar tre shkarkimet e bujshme që janë bërë në administratë.

Drejtori i Agjencisë së Tatimeve në Kosovë, Drejtori i Doganës, si dhe Drejtori i Përgjitshëm i Policisë, kanë lënë zyrat pas urdhrit të shkarkimit të firmosur nga kryeministri.

Për kryeministrin Hoti, shkarkimi i drejtorit të tatimeve, Ilir Murtezaj, ka ardhur pas paaftësive dhe sjelljeve të këqija që janë vërejtur gjatë ushtrimit të detyrës.

“Murtezaj gjatë kohës sa ka qenë në drejtimin e tatimeve ka miratuar rregulloren e organizimit të brendshëm të administratës tatimore në kundërshtim me ligjin, pa marrë pëlqim paraprak nga ministria dhe pa u konsultuar me kryeministrin,” – u shpreh Hoti.

Gjithnjë sipas argumentimit të kryeministrit Hoti, drejtori i Përgjithshëm i Policisë, Rashit Qalaj është shkarkuar nga detyra për performancë jo të kënaqshme në udhëheqje, kontroll, mbikqyrje të policisë, si dhe në menaxhimin e shpërndarjen e buxhetit  të policisë.

Lidhur me shkarkimin e drejtorit të doganës, kryeministri Hoti ka sqaruar se tashmë është hapur një konkurs për këtë post dhe meqë drejtori aktual ka aplikuar në konkurs, është menduar zëvendësimi I tij me një funksionar që nuk është futur në konkurrim.