Rritja e të infektuarve, ISHP-ja trefishon testimet për Covid-19

Instituti i Shëndetit Publik ka filluar të kryejë 1330-1400 teste në ditë, duke trefishuar numrin e testimeve në krahasim me katër muajt e parë të pandemisë. Kështu u shpreh doktoresha Eugerta Tomini, për emisionin ‘Me pak fjalë’, në Euronews.

“ISHP ka mbajtur peshën e jashtëzakonshme të kësaj pandemie, duke u mbështetur dhe nga laboratori mikrobiologjik në QSUT.

Aktualisht nga gushti deri tani, kemi një përqindje shumë të vogël të laboratorit privat, por dua t’ju garantoj që gati 95 për qind e asaj çka raportohet është kapaciteti i plotë i ISHP-së”, sqaroi Tomini.

Doktoresha sqaroi se të gjitha mostrat me rezultat pozitiv nga laboratorët jopublikë duhet të vijnë nga këta laboratorë në ISHP:

“Ritestohen pranë ISHP-së dhe më pas ata konsiderohen si pozitivë nëse kemi të njëjtën diagnozë me laboratorin jopublik.Kjo procedurë do të zgjasë deri në momentin e një fuqizimi të plotë të kapaciteteve të laboratorëve jopublikë për ta patur të certifikuar në mënyrë të plotë atë licence që kanë marrë”.

Tomini siguroi se “strategjia vjeshtë-dimër do të rrisë kapacitetet për testime. Ardhja e vjeshtës dhe dimrin e vështirëson dallimin e Covid-19 nga infeksionet e tjera respiratore, përfshirë dhe gripin.”