Zv.ministri i Shëndetësisë tregon grupmoshat që po përhapin virusin në RMV: Ku dështuam si shoqëri

Në Maqedoninë e Veriut kanë hyrë në fuqi kufizimet e reja. Në kuadër të masave kundër COVID-19 dyqane, lokale e biznese nuk mund të punojnë pas orës 23.00 të mbrëmjes.

Zëvendësministri i Shëndetësisë së RMV, Ilir Hasani tha për Euronews Albania rritja e numrit të të infektuarve po ndodh në të gjitha shtetet evropiane, por sidomos në RMV vihet re një trend agresiv i rritjes së personave që po rezultojnë pozitivë me COVID-19.

Z. Hasani tha se janë identifikuar disa pika, që sipas tij tregojnë dështimin si shoqëri në parandalimin e përhapjes kaq të shpejtë të sëmundjes.

“Ka pasur vende ku janë bërë tubime masive në disa kafene në orët e vona në Shkup ku edhe numri i të sëmurëve është rritur. Numri më i madh i të infektuarve është parë tek mosha 20-29 dhe 30-39 vjeç”, u shpreh zv.ministri.

Ai theksoi se përveçse shkurtohet orari i punës, janë edhe disa masa të tjera të marra me qëllim parandalimin e përhapjes së virusit, duke nisur nga zvogëlimi i decibelëve pas orës 21:00 të mbrëmjes, e deri tek reduktimi i tavolinave në bar-restorante, që sipas z. Hasani janë vatrat kryesore të përhapjes së virusit.

“Unë kam biseduar për zvogëlimin edhe më të madh të orarit të punës, sepse kontakti më intensiv ndodh në orët e vona, kur konsumohet më shumë alkool, kështu që veç shkurtimit të kohës, kemi marrë edhe masa të tjera serioze. Masa e parë është zvogëlimi i decibelëve pas orës 9 të darkës.

Në kafene nuk ka muzikë pas orës 9 më shumë se 40 decibel, që është shumë pak. Personat nuk mund të qëndrojnë në këmbë në lokal dhe tavolinat duhet të jenë larg njëra-tjetrës”, u shpreh zv.ministri, teksa theksoi se të gjitha këto masa merren për të ndihmuare në mospërhapjen e këtij virusi, jo se i do qeveria në RMV, Shqipëri apo Kosovë.