Naftëtaret nuk heqin dorë nga greva, refuzojnë dialogun me qeverinë

Gratë naftëtare të Ballshit nuk tërhiqen nga greva e urisë. Ato kanë hyrë në ditën e 11-të sot dhe vazhdojnë të refuzojnë dialogun me kryeministrin Rama pavarësisht thirrjeve të tij të njëpasnjëshme.

“Gjendja është e rënduar, qoftë shëndetësore, po ashtu edhe psikologjike, presim zgjidhje, por asgjë… Ftesa e kryeministrit për bisedime? Ne jemi gënjyer disa herë dhe nuk kemi më besim prandaj duam rrogat që kemi fituar me gjyq, të kalojë rrogat dhe më pas të diskutojë çfarë të dojë për gjërat e tjera, këtë e kemi të padiskutueshme.

Qante një shoqja jonë sepse nuk kishte para të blinte një paracetamol për fëmijën, si do veprojmë kështu? Gratë parlamentare shkojnë dhe bëjnë spektakël për kancerin e gjirit, o ka kancer të gjirit në uzinën e Ballshit, nuk ka në asnjë vend të Shqipërisë, këtu jemi në vështirësi dhe këta tallen me ne”, Luljeta Sulka , naftëtare në grevë.

Ndërkaq, kreu i Sindikatës së Naftëtarëve, Sokol Dautaj ka rezultuar me COVID-19 dhe për rrjedhojë është karantinuar.

Ndonëse disa prej grave kanë shfaqur probleme shëndetësore, ato nuk kanë hequr dorë nga greva teksa shkojnë edhe më tej duke paralajmëruar se do u bashkohen edhe fëmijët në këtë betejë.