Kumbulla ndal Milanin, ndeshje spektakolare në ‘San Siro’, mbrojtësi kuqezi protagonist për kryeqytetasit

Marash Kumbulla gjen golin e dytë në pak ditë me skuadrën e Romës. Pasi ndëshkoi Jang Bojs në Europa League, mbrojtësi i Kombëtares së Shqipërisë tundi rrjetën e Milanit, në javën e pestë të kampionatit, duke treguar dhe një herë se tek Roma ka arritur që të përshtate më së miri.

Në San Siro, u zhvillua një 90-minutësh mjaft i bukur dhe me emocione, ku në total u shënuan 6 gola.

Milan vinte me mungesat e Donarumes dhe Hauge, por sërish tregoi se ky sezon është ndryshe për ta. Zllatan Ibrahimoviç nuk ka të ndalur, pasi ishte suedezi që hapi festivalin e golave, vetëm pak sekonda pasi kishte filluar loja.

Festa e kuqezinjve nuk zgjati shumë, pasi kapiteni Edin Xheko vendosi ekuilibrin në minutën e 14-të. Pjesa e parë nuk prodhoi më gola, pavarësisht rasteve të krijuara.

Në fraksionin e dytë Salmakers realizoi golin e avantazhit për ekipin e Piolit. Roma fitoi të drejtën e një penalltie të kontestuar nga ana e Milanit, që u kthye në gol nga Veretut.

Kuqezinjtë nuk u dorëzuan dhe e gjetën avantazhin për të tretën herë, sërish me Ibrahimoviç, po gëzimi i kryesuesve të kampionatit u ndërpre nga lojtari i Shqipërisë, Marash Kumbulla.

Në fund, nga një pikë për të dyja skuadrat, me Milanin që e sheh veten pas pesë javësh të vetëm në krye të renditjes, me 13 pikë.