Pas 8 vitesh mungesë, rikthehet Festivali Folklorik në Gjirokastër

Pas një ndërprerjeje 8-vjeçare në qytetin e Gjirokastrës rikthehet organizimi i Festivalit Folklorik Kombëtar.

Në muajin qershor në skenën e kalasë së Argjiros do të performojnë artistët e folkut nga hapësira mbarëshqiptare. Krahas vlerave kombëtare dhe artistike, festivalet folklorike në vite janë lidhur me vetë jetën e qytetit të gurtë dhe banorëve të tij.

“Është gjë fantastike në Gjirokastër, përsëri po vjen në kala Festivali Folklorik dhe është kënaqësi  për Gjirokastrën që gjitha këto punime, këto bukurira të vazhdojnë. Marr pjesë në të gjitha festivalet”, thotw  Arjan Shehu, këngëtar popullor.

“Çdo festival ka emocione të veçanta , çdo festival është i destinuar t’iu krijojë njerëzve emocione sepse i thonë kala. Edhe grupi i Lunxhërisë është i përfshirë në këtë vorbull ngjarjesh dhe aktivitetesh  që po zhvillohen . Ne po punojmë që të sjellim patjetër diçka të re”, shprehet Koço Vasili, specialist i folklorit.

Festivali i parë Folklorik Kombëtar në Gjirokastër është organizuar në vitin 1968 duke pasur një periodicitet çdo 5 vjet. Në këtë organizim mbarëkombëtar prezantohen vlerat e traditës, folklorit dhe etnografisë shqiptare.

LEXONI GJITHASHTU:

• Një poster për lirinë, Festivali i Posterit sjell në Tiranë artistë nga mbarë bota
• Formula e re e festivalit, dështim, Zaloshnja: Kënga fituese jo në dorë të publikut