Turqia në ditën e 12 pas tërmetit, 3 persona nxirren të gjallë nga rrënojat

Operacionet e kërkim-shpëtimit vazhdojnë me rigorozitet në Hataj.

Tre persona, përfshirë një të mitur, u nxorën të gjallë nga rrënojat e apartamentit të tyre 12 ditë nga tërmetet. Ata u dërguan në spital, por fatkeqësisht fëmija i vogël ndërroi jetë në ambulancë.

Ndërkohë, njerëzit po përpiqen të gjejnë forcat pas lëkundjeve të fuqishme. Shumë shkolla u shembën ose u dëmtuan në rajon. Shumë fëmijë humbën shkollat e tyre.

Në qytet janë ngritur tenda dhe janë angazhuar shërbime sociale për të organizuar aktivitete shkollore për fëmijët. Disa prej tyre pranojnë të flasin për mediat.

“Fëmijët po vizatojnë, po luajnë, po vrapojnë dhe po flasin me njëri-tjetrin. Atyre u mungon shkolla. Për momentin nuk ka mësim, sepse shkollat janë shembur. Shpresoj të rindërtohen së shpejti. Edhe unë kam vizatuar diçka së bashku me vëllain tim. Ky është vëllai im. Jemi së bashku, zemër për zemër”, thotë një vajzë.

Mësuesit, që i kanë ndarë tendat për grupet shkollore fillore, sekondare dhe të mesme, e nisën punën duke vendosur flamurin turk në dyert e tyre.

Krahas mësimit tradicional, ata mbajnë orë të veçanta për studentët që po bëhen gati për shkollën e mesme dhe atë të lartë. Ata kanë kërkuar ndihmë edhe nga komuniteti ndërkombëtar shkollor.

LEXONI GJITHASHTU:

• Kur fati të merr jetën, futbollisti planifikoi të largohej pak para tërmetit
• Mbi 45 mijë viktima nga tërmeti në Turqi dhe Siri, shumë të tjerë ende të zhdukur