Mbi 600 gjoba për maskën, ndëshkon me 1 mln lekë katër pronarë lokalesh

Policia e Shtetit që prej hyrjes në fuqi të aktit normativ që bën të detyrueshme mbajtjen e maskës dhe në ambient të hapur, ka ndëshkuar me gjobë mijëra persona. Vetëm 24 orët e fundit janë gjobitur 607 persona me nga 3 mijë lekë të reja secili.

Gjobat janë vendosur gjatë kontrolleve në terren në të gjithë vendin, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.  Ndëshkimet janë bërë në të gjithë vendin, nga Patrullat e Përgjithshme dhe ato të Policisë Rrugore.

Gjithashtu, gjatë kontrolleve, shërbimet e Policisë kanë konstatuar 4 lokale, në ambientet e të cilëve kishte muzikë pas orës 20:00 dhe nuk respektoheshin protokollet e sigurisë që kanë si qëllim parandalimin e përhapjes së COVID-19. Secili prej administratorëve të këtyre lokaleve është ndëshkuar me masën administrative 1.000.000 lekë.

Gjatë këtyre kontrolleve janë shoqëruar në ambientet e Policisë në të gjithë vendin, 11 shtetas që nuk kanë pranuar t’i tregojnë punonjësve të Policisë dokumentin e identifikimit apo nuk e kanë pasur atë me vete, të cilët pasi kanë paraqitur dokumentin e identifikimit, janë ndëshkuar me masën administrative 3.000 lekë dhe më pas janë lënë të lirë.