Zgjedhjet e 25 prillit, KQZ ngre grupin e punës për votimin e emigrantëve

Komisioneri Shtetëror i Zgjedhjeve, Ilirjan Celibashi ka ngritur grupin e punës lidhur me mundësinë e votimit të shqiptarëve që jetojnë jashtë vendit, për zgjedhjet e 25 prillit.

Detyra e grupit të punës të ngritur me këtë rast është të shqyrtojë mundësinë e votimit në zgjedhjet e 25 prillit të shtetasve shqiptarë me të drejtë vote, që janë rezidentë në një shtet tjetër.

Ndër të tjera grupi i punës duhet të përgatisë një vlerësim mbi llojin, procedurën e votimit manuale ose elektronike duke marrë në konsideratë kushtet e vendit tonë si edhe të bëjë një vlerësim mbi kostot financiare.

Vota e emigrantëve është një çështje e bartur nga çdo palë zgjedhje të zhvilluara që nga futja e pluralizmit në vendin tonë, por që nuk ka mundur të bëhet realitet në asnjë prej proceseve zgjedhore.

Subjektet politike e kanë përdorur në çdo fushatë si premtim elektoral për zgjedhjet e ardhshme, por askush nuk ka mundur ta finalizojë.

Shumë shpesh shtetasit shqiptarë që jetojnë jashtë janë shprehur se ndihen të mënjanuar nga vendi i tyre në momentin që nuk u jepet e drejta të zgjedhin përmes votës.