Ecnin dy orë për në shkollë! Fondacioni ”Shoqëria e Hapur” u siguron një makinë pas thirrjes së Euronews Albania

U duhej të shkonin në këmbë çdo ditë në shkollë në temperatura të ulëta për afro dy orë. Katër të mitur të vetëm në rrugë të ekspozuar ndaj rreziqeve e të pambrojtur. Dy javë më parë Euronews Albania rrëfeu historinë prekëse që sensibilizoi qytetarët, shoqërinë civile dhe lëvizi mekanizmat e vështirë të pushtetit vendor. 

“Rrofshi, faleminderit, gjithë të mirat, falënderojmë Euronews-in”, tha Fatmir Ibraj.

Fondacioni “Shoqëria e Hapur për Shqipërinë” ka marrë përsipër mbulimin e shpenzimeve për një mjet transporti deri në Janar.  Prindërit thonë se marrin frymë më të lehtësuar. 

“Tani ju faleminderit juve njëherë që kontribuuat për këtë gjë dhe tani jemi më të lirë, shumë më të lirë. Shumë të kënaqur me zgjidhjen, fëmijët makinën e kanë, s’kemi asnjë problem”, tha Klodi Ibraj,  prindi i njërit prej fëmijëve.

“Ishte e vështirë po falë punës kolektive, dhe një bashkëpunim perfekt u zgjidh në mënyrën e duhur. Na bën të lumtur e te gëzuar të gjithëve për faktin e vetëm se fëmijët në një kohë të vështirë në dimër, në shi, në diell bënin atë rrugë 6-7 km, për këtë fakt na bën shumë të lumtur që mori zgjidhje një problem shumë delikat”, tha Altin Prifti, administratori i njësisë administrative Vithkuq. 

Sot KLeo, Alisja, Mikaela dhe Trifoni shkuan në shkollë pa u dridhur nga të ftohtit dhe pa ecur me orë të tëra. Makina e transportit i çon dhe i sjellë nga shkolla. Çfarë përshkohej për dy orë në këmbë, tanimë është 15 minuta me makinë.

“Falë shqetësimit të ngritur nga Euronews Albania, bashkëpunimit me kryetarin e njësisë administrative Altin Prifti, Komisioneren Kundër Diskriminimit Eva Prifti, falënderues jemi dhe ndaj fondacionit Shoqëria e Hapur, fëmijët mund të vijnë në shkollë me makinë. Tanimë, topi është në fushën e pushtetit lokal”, thotë gazetari Xhensil Shkëmbi.

Janari vjen shpejt dhe në shkurt fëmijët do të jenë sërish pa mjet transporti. Ndaj letrat e shkresat e pushtetit vendor duhet të qarkullojnë shpejt dhe miratimet e fondeve duhet të realizohen në kohë.

Lexoni gjithashtu: 

Dy orë rrugë në këmbë për të shkuar në shkollë