Opozita dhe Bashkia Tiranë replika për mënyrën si po veprohet me rindërtimin e shkollës ”Sami Frashëri”

Opozita vijoi të martën replikat me Bashkinë Tiranë rreth projektit të rindërtimit të shkollës së mesme Sami Frashëri në Tiranë.

Ish-deputetja e Partisë Demokratike, Jorida Tabaku, denoncoi nga sheshi i ndërtimit atë që e quajti si “fasadë” pasi 10 ditë pas përurimit të punimeve atje “nuk ka asnjë lëvizje”.

Sipas demokratëve shkolla u prish më 24 prill pa pasur një projekt të miratuar, ndërkohë që në mënyrë të pashpjegueshme projekti për shkollën e re është më i shtrenjtë se ai i shkollave të tjera të cilat janë parashikuar për t’u rindërtuar pas dëmtimit nga tërmeti i 26 nëntorit 2019.

“Pse ‘Sami Frashëri’ kushton 4.5 milion euro, ndërkohë që shkollat e tjera të ngjashme, të cilat ndërtohen me fondet e BE-së kushtojnë 700 mijë euro? Kush janë kompanitë që qëndrojnë pas këtij ndërtimi,” – i drejtoi pyetjet dyshuese Bashkisë dhe qeverisë ish-deputetja Tabaku.

Demokratët thonë se qeveria gënjeu kur përmes ministrit Arben Ahmetaj deklaroi se shkolla në fjalë do të ndërtohet nga fonde të Bashkimit Evropian, ndërkohë që “BE-ja konfirmon të kundërtën”.

ER dhe EV 24/7 vetëm mashtrojnë dhe manipulojnë shqiptarët. Pamje nga çka mbetur nga shkolla “Sami Frashëri” askush nuk punon pasi s’ka asnjë projekt dhe mbi të gjitha fondet nuk janë nga #BE

E vërteta prevalon ndaj gënjeshtrave! pic.twitter.com/BBZ5c8IMl0

— Jorida tabaku (@jorida_tabaku) November 2, 2020

Për projektin e rindërtimit të Shkollës Sami Frashëri, kryetarja e Lëvizjes Socialiste për Integrim, Monika Kryemadhi ngriti akuza për tjetërsime të pronës dhe për projekt pa tenderim.

Vetë kryetari i Bashkisë Tiranë Erion Veliaj reagoi më vonë duke postuar në Twitter një video, ku shfaqeshin punonjës duke sistemuar hekura të kollonatave në një shesh punimi që Veliaj e nënkuptoi të ishte ai i shkollës “Sami Frashëri”.

“Nuk është problem që u çmendën, por u çmendën të dyja njëherësh. Cytet Mona me Jorin, kush do thotë marrëzinë më të madhe, budallallëkun më epik, histerinë më ekstreme. Boll se latë nam, a keni cipë, a skuqeni para fëmijëve, a keni turp, a keni familje?” – shoqëroi me këtë koment videon në Twitter Veliaj.

Më herët kryebashkiaku kishte publikuar disa dokumente të pronësisë, të cilat ai theksoi se ishin të shkollës duke përgënjeshtruar pretendimet e kryetares së LSI-së, Kryemadhi, e cila gjithashtu shfaqi në konferencën e saj për shtyp dokumente.

Sami Frasheri LIVE ?

Nuk eshte problem qe u cmenden, por u cmenden te dyja njeheresh. Cytet Mona me Jorin kush do thote marrezine me te madhe, budalleken me epik, histerine me ekstreme. ??‍♂️

Boll se late nam – a keni cipe, a skuqeni para femijeve, a keni turp, a keni familje? ? https://t.co/aCdJi8uvu4 pic.twitter.com/wWv4GJ8OjD

— Erion Veliaj ?‍♂️?⚽️?? (@erionveliaj) November 3, 2020