Shifra rekord me COVID, Kosova në karantinë të plotë nga e premtja në të hënë

Në kuadër të masave të reja anti-COVID, qeveria në Kosovë ka marrë vendimin për të mbyllur vendin në karantinë gjatë fundjavës.

Më konkretisht komiteti i ekspertëve ka vendosur që të vendosë mbylljen e të gjitha aktiviteteve në vend, duke nisur nga ora 20:00 e së premtes deri në orën 5:00 të mëngjesit të së hënës.

Një ditë më parë, Kosova vendosi një tjetër rekord negativ sa i përket COVID-19 duke shënuar 661 raste në 24 orë.

Masat kufizuese kanë nisur të shtrëngohen gradualisht në disa vende europiane. Një ditë më parë Greqia mori vendimin për të hyrë në një izolim kombëtar.

Kryeministri grek Kyriakos Mitsotakis njoftoi se bllokimi do të jetë trejavor duke filluar nga e shtuna në mëngjes, duke thënë se rritja e infeksioneve të coronavirusit duhet të ndalet para se sistemi i kujdesit shëndetësor të Greqisë të vihet në presion “të padurueshëm”.