Sulmohet qendra e numërimit në Filadelfia, policia shmang agresionin e armatosur

Policia në Filadelfia deklaroi se po heton një komplot për të sulmuar qendrën e konventave të qytetit, ku po numërohen votat e kontestit elektoral presidencial.

Policia mori informacion për një makinë tip “Hummer” e drejtuar nga persona të armatosur, të nisur nga Virxhinia, që kishin si qëllim të sulmonin qendrën e numërimit.

Agjentët kanë mundur të arrestojnë një person, të sekuestrojnë një armë automatike, si dhe automjetin me të cilin lëviznin të dyshuarit. Për fat të mirë nga incidenti nuk ka pasur persona të lënduar.

Ndërkohë, ditën e enjte, mbështetësit e presidentit Donald Trump, por edhe të rivalit të tij demokrat Joe Biden mbajtën mitingje paralele në Filadelfia, në një kohë kur funksionarët zgjedhorë vijonin të numëronin disa mijëra vota të ardhura me postë.

Simpatizantët e presidentit në detyrë mbanin parulla të tipit “Votimi mbaron ditën e zgjedhjeve” dhe “Qendrat e votimit janë të mbyllura”. Ndërsa ata të Biden vallëzuan nën tingujt e muzikës prapa një barrikade të vendosur në rrugë.

Të njëjtën ditë, gjykata vendosi se më shumë vëzhgues republikanë mund të hynin në ndërtesën ku po zhvillohej procesi i numërimit.