Atentati ndaj prokurorit të Vlorës, dosja pritet të kalojë në Fier për shkak të konfliktit të interesit

Atentati i të shtunës ndaj prokurorit të Vlorës Albert Kuliçaj nga mënyra si është kryer është një paralajmërim për të.

Motivi i kësaj ngjarje për grupin hetimor nuk ka dyshime se është për shkak të detyrës së prokurorit, i cili prej disa vitesh ushtron atë prej 9 vitesh në qytetin bregdetar.

Por zbardhja e atentatit do të jetë e vështirë pasi personi i cili duket në kamera teksa vendos eksplozivin në automjetin e prokurorit është i maskuar dhe është i pamundur identifikimi vetëm nga ky filmim.

Për këtë arsye po verifikohen pamjet e disa kamerave të tjera në zonë. Dosja aktualisht po hetohet nga prokuroria e Vlorës, por pritet të kalojë në Fier për shkak të konfliktit të interesit. Nëse prokuroria e rrethit arrin të gjejë elementë se atentati është kryer nga një grup i strukturuar kriminal, atëherë kjo dosje mund të kalojë në SPAK.

Kuliçaj ka hetuar disa dosje të rëndësishme në Vlorë, siç është ajo e pronave në bregdet dhe çështjen e ish-kryetarit të bashkisë, Shpëtim Gjika. Grupi hetimor do të kalojë në sitë disa dosje sekuestrosh edhe llogarish bankare të cilat janë hetuar nga Kuliçaj.