Avdullah Hoti: Vendi është në gjendje lufte me situatën e krijuar nga COVID-19

Në orët e para të mëngjesit të sotëm, kryeministri i Kosovës, Avdullah Hoti vizitoi Klinikën Infektive në Prishtinë, e cila po përballet me një numër të madh të pacientëve të infektuar me COVID-19. Në këtë vizitë ishte i pranishëm edhe ministri i Shëndetësisë, Armend Zemaj.

Hoti përsëriti se vendi është në gjendje lufte me situatën e krijuar nga COVID-19 .Ai tha se do të angazhojnë staf shtesë që do të jetë në ndihmë të  pacientëve.

“Bashkë me ministrin do të jemi këtu në vizita të rregullta dhe do të bëjmë të pamundurën që të gjithë pacientët të marrin ndihmën e duhur mjekësore”, u shpreh ai, raporton Kosova Press. 

Ndërsa Drejtoresha e Klinikës Infektive, Lindita Berisha bëri të ditur se në këtë klinikë sot janë të shtrirë 106 pacientë, ku 60-70% prej tyre janë me oksigjen, dhe 6 pacientë me respiratorë.

Ajo tha se lirimi i disa pacientëve po mundëson hospitalizimin e të tjerëve.

Sakaq, mjeku Salih Ahmeti u shpreh se kjo është faza më e rëndë në menaxhimin e pandemisë, për shkak edhe të gripit sezonal.

Lexoni gjithashtu: 

777 pacientë kanë humbur betejën me COVID-19 në Kosovë, mbi 8 mijë të tjerë të infektuar

Kufizime në 7 komuna të Kosovës, kundërshtojnë partitë kryesore të vendit