Ministrja Anila Denaj e infektuar me COVID: Jam karantinuar, po ndjek udhëzimet e mjekëve

Ministrja e Financave dhe Ekonomisë, Anila Denaj ka rezultuar e infektuar me koronavirus. Lajmin e ka dhënë vetë Denaj nëpërmjet një postimi në Facebook, ku shkruan se është karantinuar dhe se po ndjek udhëzimet e mjekëve. 

Denaj iu bën thirrje qytetarëve që të zbatojmë rregullat e higjienës dhe të mbajmë maskën, duke ruajtur edhe distancën sociale.

“Të dashur miq. Pas testimit për COVID 19, ju informoj se kam rezultuar pozitive. Aktualisht jam karantinuar, duke ndjekur udhëzimet e mjekëve për hapat e mëtejshëm dhe trajtimin gradual të sëmundjes.

Ju ftoj të gjithëve, të zbatojmë rregullat e higjienës dhe të mbajmë maskën duke ruajtur distancën sociale.

Ju uroj shëndet të plotë!”, shkruan ministrja.

Ndërkohë në Shqipëri rëndohet nga dita në ditë bilanci i COVID-19. Ministria e Shëndetësisë bëri më dije një ditë më parë se 11 pacientë me COVID-19  kanë humbur jetën orët e fundit. Ndërsa, 140 të tjerë u raportuan  të shëruar dhe 507 persona të tjerë rezultuan të infektuar.

Kështu totali i viktimave në Shqipëri nga COVID-19 ka shkuar në 590 (2.28% e totalit të rasteve).

Lexoni gjithashtu: 

Njëmbëdhjetë viktima dhe mbi 500 raste të reja me COVID-19 në Shqipëri