Ligji për metrologjinë, Meta: Të hetojë SPAK, shteti po heq dorë nga një shërbim publik

Presidenti Ilir Meta i ka bërë thirrje të përsëritur SPAK-ut të nisë menjëherë hetimet për ligjin e metrologjisë pasi ia ktheu Kuvendit për rishqyrtim. Meta e cilësoi si antikushtetues ligjin për matjen e cilësisë së hidrokarbureve pasi sipas tij përmes këtij ligji, shteti heq dorë nga një shërbim publik.

“E ktheva këtë ligj dhe dje njoftova SPAK për nisjen e hetimeve të procesit të draftit dhe propozimit të këtij projektligji.”

Në konferencën e përjavshme me gazetarët, ndryshe nga herët e tjera presidenti u shfaq me maskë, ndërsa bëri thirrje për rritje të testimeve.

“Duhet të merren masa për të frenuar këtë situatë. Është tepër e domosdoshme që qytetarët të testohen, që të mbrojnë veten dhe familjarët. Qytetarët duhet të trajtohen me protokolle mjekësore të qarta që shëndeti i tyre të mos jetë objekt improvizimesh që kërcënon jetën e tyre dhe kthehet në biznes për të tjerët”, tha kreu i shtetit.

Nga ana tjetër Meta e cilësoi si turp, propozimin e maxhorancës për ngritjen e një komisioni parlamentar për të hetuar akuzat e Dick Marty.

“Ky është problem serioz, nëse ka një parlament serioz, nëse është një bandë le ta miratojnë.. Kjo është turpi më i madh që bën Kali të Trojës sepse dihet kush i fabrikoi akuzat e Dick Martin se cilat vende dhe shtete e mbështetën dhe sponsorizuan se kërkon të fusë përçarjen mes shqiptarëve. Ca mund të them më shumë”, tha Presidenti.

Përpos këtyre ngjarjeve, Presidenti Meta i tërhoqi vëmendjen Qeverisë duke thënë se në këtë situatë pandemie nuk është koha për tenderë dhe PPP.