‘Privatët të lidhur me farmacitë’, Rama: Mos blini ilaçe në kushtet e shtëpisë

Kryeministri Edi Rama ka sulmuar nga Vlora opozitën, e cila sipas tij, shpresën e fundit për t’u kthyer në pushtet e ka varur te virusi i padukshëm. Sipas kryeministrit, e opozita po pret që sistemi shëndetësor të bjerë në kolaps e njerëzit të mos gjejnë shtrat ku të shtrohen.

Për shefin e qeverisë, opozita bën propagandë ndërsa realiteti i spitaleve është krejt ndryshe.

“Propagandë bëjnë ata të cilët flasin dhe tregojnë një realitet që nuk është realiteti i spitaleve tona sot, ndërkohë që ne tregojmë me transformimin në realitet se jemi absolutisht sot në lartësinë e një sfide, që është sfidë për mbarë njerëzimin.

Në çdo spital ku në atë kohë ishte e vështirë të dalloje kush ishte mjeku, infermierja, familjarët, kalimtarët dhe shitësit që në të njëjtën kohë bënin tregti nëpër spitale.

Ashtu sikundër në atë kohë ishte e pamundur të imagjinoje se në Shqipëri do të kishte spitale jo vetëm të mirëpajisur, po që do t’u përgjigjeshin pacientëve me çdo protokoll, pa e detyruar këdo që të vinte me çarçaf e batanije me vete”, tha kreu i qeverisë gjatë aktivitetit ‘Deputeti që duam’, në qytetin e Vlorës.

Thirrjen e opozitës dhe presidentit për shtimin e testeve, Rama e injoroi duke argumentuar se kjo strategji nuk e ka ndërprerë zinxhirin e infeksionit.

Por, kreu i ekzekutivit bëri apel që qytetarët mos kërkojnë të bëjnë tampon apo të shpenzojnë për barna orientimin e mjekut.

“Kur je në kushtet e shtëpisë nuk ke pse shkon edhe mbyt veten me ilaçe…Mos blini ilaçe kot. Në Itali problemi është që privatët të ngarkojnë me ilaçe, janë të lidhur me farmacitë”, tha kryeministri.

Sulmet në bllok për Metën, Bashën e Kryemadhin dhe votat për mandat të tretë, ishin pjesë e vijimit të fjalimit të kryemistrit në takimin “Deputeti që duam”.