Shoqërimi në Komisariat i Kastriot Islamit, reagon Policia e Tiranës

Policia e Tiranës ka bërë një deklaratë për mediat lidhur me pretendimet e ish-deputetit Kastriot Islami se është shoqëruar në mënyrë të padrejtë.

Në reagimin zyrtar të policisë thuhet se, z. Islami ka fyer një prej oficerëve të policisë në momentin që do të gjobitej për mos mbajtjen e maskës.

“Në mënyrë të përsëritur shtetasi Kastriot Islami është prononcuar publikisht me pretendimin që Policia e Shtetit e ka keqtrajtuar. E vërteta është se ky shtetas ka keqtrajtuar punonjësit e patrullës policore me një fjalor shumë të ulët.

Kastriot Islami është ndaluar nga patrulla  e Përgjithshme si një kalimtar pa maskë. Ai menjëherë ka lëshuar  ndaj punonjësve të policisë fjalë të ulëta, duke pretenduar se ai ishte një figurë publike që nuk mund të ndalohej prej tyre. Madje  shtetasi i ka kërcënuar punonjësit e policisë, që “do ta shihnin pas 25 prillit, si të gjithë zagarët e Ramës”!

Patrulla e policisë është detyruar ta shoqërojë atë në komisariat, ku janë kryer procedurat ligjore dhe i është komunikuar gjoba për mosmbajtjen e maskës mbrojtëse. Duke hedhur poshtë akuzat e fabrikuara nga shtetasi Kastriot Islami për Policinë e Shtetit dhe shprehur keqardhjen për fjalorin e tij ndaj punonjësve tanë, gjejmë rastin të theksojmë se Policia e Shtetit nuk i shërben politikës por ligjit”, përfundon reagimi i Policisë së Tiranës.

Lexoni gjithashtu:

Gjobitet për mosmbajtje të maskës ish-deputeti Kastriot Islami

‘Akt banditesk’, Kastriot Islami reagon sërish për shoqërimin në Polici: E keqja ka kapur për fyti vendin dhe shqiptarët!