U kap duke transportuar 4 klandestinë, arrestohet 32-vjeçari në Pogradec

Policia e Pogradecit ka arrestuar 32-vjeçarin me iniciale D.M, pasi është kapur në aksin rrugor Pogradec-Librazhd duke transportuar 4 emigrantë të jashtëligjshëm.

Sipas uniformave blu, 32-vjeçari do u merrte secilit emigrant 215 euro për transportin me makinën të tipit “Benz”.

“Strukturat për Hetimin e Krimeve në Drejtorinë Vendore të Policisë Korçë, në bashkëpunim me Policinë Kufitare, Sektorin e Policisë Rrugore dhe Komisariatin e Policisë Pogradec, në vijim të operacionit policor “Perimetri”, kanë goditur një tjetër rast të aktivitetit kriminal në fushën e dhënies ndihmë shtetasve të huaj për kalim të paligjshëm të kufirit, kundrejt shpërblimit, si rezultat i të cilit u bë kapja dhe arrestimi në flagrancë i shtetasit D. M., 32 vjeç, banues në Korçë.

Ky shtetas është kapur nga shërbimet e Policisë, në aksin rrugor Pogradec-Librazhd, pranë vendit të quajtur “Lumi i Tërhanit”, duke transportuar në drejtim të Tiranës, me mjetin tip “Benz”, 4 emigrantë të paligjshëm, të cilëve, kundrejt fitimit 215 euro për secilin, iu kishte premtuar kalimin drejt vendeve të BE-së”, njofton Policia.