Tjetër takim Kurti-Mustafa, VV-ja dhe LDK-ja përpjekje të dytë për krijimin e Qeverisë së re

27 ditë pas certifikimit të rezultatit të zgjedhjeve, kryetari i Lëvizjes Vetëvendosje, Albin Kurti dhe ai i Lidhjes Demokratike, Isa Mustafa, pritet të takohen në një përpjekje të re për arritjen përfundimtare të marrëveshjes për krijimin e Qeverisë së re.

Takimi që vjen vetëm dy ditë para mbledhjes konstituive të Kuvendit të Kosovës, i gjen këto parti në një kohë ngërçi në bisedimet lidhur me postin e presidentit, pasi paraprakisht palët janë pajtuar në parim për ndarje të pushtetit ekzekutiv.

Javën e kaluar, deputetët gjermanë Peter Beyer e Christian Schmidt, por edhe zyra e Bashkimit Evropian dhe Ambasada e Shteteve të Bashkuara të Amerikës në Prishtinë, u kërkuan partive që të mos mbesin peng të marrëveshjes për pozitën e presidentit, që do të lirohet në pranverën e vitit 2021, por të krijojnë Qeverinë e re sa më shpejt.