Akuzat për fshehje të viktimave nga COVID, kreu i Mjekësisë Ligjore: Morgu jo në varësinë tonë, por të QSUT

Akuza e kreut të PD, Lulzim Basha se po manipulohen qëllimisht numri i viktimave nga COVID ka ngjallur reagime të shumta, fillimisht në radhët e mjekëve të Infektivit që kanë dalë me një deklaratë lidhur me këtë akuzë e më tej edhe kryeministri Edi Rama.

Gazetari i Euronews Albania, Renaldo Salianji ishte pranë Institutit të Mjekësisë Ligjore në Qendrën Spitalore “Nënë Tereza”, ku pyeti lidhur me këtë cështje drejtorin e Mjekësisë Ligjore, Bledar Xhemali i cili bëri me dije se morgu nuk është në varësi të tij, por në varësi të QSUT.

QSUT nga ana e saj, e pyetur nga Euronews Albania nuk ka pranuar të bëjë asnjë koment lidhur me këto deklarata.

Zëdhënësja e këtij institucioni u shpreh se QSUT nuk merret me deklarata politike.

Lidhur me këtë çështje ka pasur sot një reagim edhe nga SPAK, që ka thënë se nuk është kompetencë e këtij institucioni inventarizimi i të vdekurve.

Ndërkohë, Prokuroria e Tiranës që e ka në kompetencë, nuk bën me dije nëse do nisë verifikimet apo hetim kryesisht mbi akuzat.