Denoncimi i PD-së: Senatoriumi i Korçës po kthehet në spital COVID pa plotësuar standardet

Partia Demokratike denoncoi të hënën situatën në Senatoriumin e Korçës, ku dhomat e pacientëve janë pjesërisht të pajisura me linja oksigjeni.

Sipas degës së PD-së në Korçë, vetëm gjysma e dhomave dhe dy dhoma të repartit infektiv “ku janë të hospitalizuar të sëmurë me COVID në gjendje të rëndë” janë të pajisura me linja oksigjeni

“Jo vetëm kaq! Edhe në ato dhoma ku janë instaluar linja oksigjeni,presioni i tij është aq i ulët,sa nuk funksionojnë aparaturat,” – thuhet në deklaratën e opozitës.

Në deklaratën e saj PD iu drejtua ministres Ogerta Manastirliu, duke i kërkuar sqarime se si është vendosur që Senatoriumi i Korçës të kthehet në Spital COVID ndërkohë që “nuk plotëson standardet minimale” dhe nuk ka as “infrastrukturën e domosdoshme për trajtimin e të sëmurëve”.

Aktualisht sipas të dhënave të ministrisë së Shëndetësisë, nga pandemia e COVID-19 janë mbi 16 mijë persona mbartës të virusit, prej së cilëve rreth 440 gjenden të shtruar në tre spitalet e Tiranës të përshtatura për trajtimin e tyre.

Plani i qeverisë është që me fluksin në rritje të hapet spitali i katërt në Tiranë dhe po kështu spitalet rajonale të përshtasin hapësirat e tyre për trajtime paralele të qytetarëve të zonës.