Zgjedhjet e 25 prillit do jenë më të shtrenjtat në histori

25 prilli do të jetë procesi elektoral më i kushtueshëm në historinë e zgjedhjeve në Shqipëri. Komisioni Qendror i Zgjedhjeve ka përllogaritur shumën që nevojitet për instalimin e pajisjeve nëpër qendrat e votimit dhe rezultati ishte disi i kripur për financat shqiptare, 16 milionë euro.

Në total për 25 prillin do të ngrihen 5274 qendra votimi dhe është parashikuar që kompania fituese duhet të sigurojë edhe një sasi pajisjesh elektronike rezervë dhe në total do të nevojiten rreth 5400 të tilla me një kosto prej 3 mijë eurosh një.

Por tek kjo shumë parash nuk përfshihen shpenzimet e tjera si dy projektet pilot për votimin dhe numërimin elektronik, instalimi kamerave nëpërmjet qendra votimi, apo edhe paratë për të blerë edhe fletët e votimit.

Këtë shumatore Komisioni Qendror i Zgjedhjeve do ta paraqesë në tryezën e kabinetit qeveritar, i cili ditën e mërkurë është i detyruar të alokojë fondet nga buxheti i shtetit i cili këtë vit ka qenë mëse i dërrmuar nga covid-19.