‘Spiunia’ s’do ekstradohet, avokati: Në Rusi do përndiqej, ka qëndrime anti-Putin

Shtetasja ruse e akuzuar për spiunazh nga autoritetet shqiptare nuk do të ekstradohet në Rusi.

Kështu ka vendosur gjykata e Elbasanit për Svetlana Timofeeven me argumentin se në shtetin e lindjes i rrezikohet jeta.

Vetë Timofeeva nuk dha asnjë deklaratë gjatë seancës, ndërsa vendimin e mirëpriti avokati mbrojtës.

“Ishte vendimi i duhur, i bazuar në ligj. Nëse kjo shtetase do të ekstradohej në Rusi do të përndiqej, do t’i rrezikohej jeta, pasi dihet qëndrimi i saj kundër regjimit të Putinit”, tha avokati Fatmir Lushi.

Për shkak se në vendin e saj nuk do t’i sigurohen të drejtat ligjore sipas konventës së të drejtave të njeriut, Gjykata mori parasysh kërkesën e bërë nga vetë blogerja ruse për tu mos ekstraduar në Rusi.

Më herët ajo kishte kërkuar azil politik me të njëjtin argument.

33-vjecarja ruse u arrestua më 20 gusht të vitit 2022 së bashku me dy miqtë e saj Mikhail Zorin, nga Rusia, dhe Fedir Aplatov nga Ukraina. Ata u prangosen pasi tentuan të hynin në ambientet e uzinës së armëve në Gramsh dhe hodhën spraj paralizues ndaj dy ushtarëve që po e ruanin këtë objekt ushtarak.

Svetlana Timofeeva po mbahet në paraburgim në burgun e grave në Tiranë, ndërsa çështja ndaj saj gjykohet në Gjykatën e Elbasanit, pasi zona ku ndodhi ngjarja, Gramshi, përfshihet në këtë qark.

Svetlana Timofeeva do të gjykohet në Shqipëri për akuza “Dhënie të informacioneve sekrete”, dhe “Goditja për shkak të detyrës”.

LEXONI GJITHASHTU:

• Spiunia ruse refuzon ekstradimin: Nuk dua të iki, kam kërkuar azil në Shqipëri
• ‘Spiunia” e arrestuar lidhje me politikën në Rusi? Flet shoqja e saj