Një muaj më parë u riatdhesua, Anti-Terrori merr në pyetje Floresha Rashën për qëndrimin në kampin Al Hol

Pas afro një muaji nga kthimi i saj në Shqipëri, Anti-Terrori ka marrë në pyetje Floresha Rashën, e cila u lirua pas ndërhyrjes së qeverisë nga kampi famëkeq Al Hol.

Sipas burimeve të Euronews Albania, mësohet se Rasha është marrë në pyetje në cilësinë e dëshmitares për mënyrën si ka ikur në Siri si dhe për jetën në kampin e ferrit.

Ishte SPAK që kërkoi një ditë pas kthimin të saj që ajo të merrej në pyetje. Ajo do të hetohet nëse ajo ka qenë e përfshirë për 7 vite në Al-Hol në akte terrori apo jo.

Gjithashtu janë marrë në pyetje edhe fëmijët e saj në prani të psikologut.

Floresha Rasha shkoi në Siri 6 muaj pas bashkëshortit të saj Diamant Rasha, i cili u vra duke e lënë gruan të vetme me djalin Amarin dhe vajzën adoleshente. Sipas të dhënave, ajo më pas u martua me Lavdërim Muhaxherin.

Edhe ky i fundit mbeti i vrarë nga forcat amerikane në vitin 2017. Në martesën e saj të dytë, Floresha solli në jetë dy fëmijë, një djalë dhe një vajzë.

Pas vrasjes së Lavdërimit, Floresha u martua sërish. Këtë herë me një luftëtar sirian. Solli në jetë një tjetër vajzë.

Në kushtet e luftës në kamp, edhe burri i tretë i Floreshës u vra bashkë me vajzën e madhe, të cilën e kishte me Diamant Rashën, ndërsa Floresha mbeti e plagosur rëndë.

Më 27 tetor Floresha dhe 3 fëmijët e saj prekën tokën shqiptare. Ndërkohë sipas qeverisë pritet që të ketë edhe një valë të dytë për riatdhesimin e shqiptarëve të tjerë nga Al-Hol.

Lexoni gjithashtu: 

Dje u kthye nga Siria, SPAK do ta marrë në pyetje Floresha Rashën për të gjetur rekrutuesit dhe financuesit

Riatdhesohen pesë shqiptarët e parë nga Siria, gëzim dhe lot në pikën kufitare të Rinasit