Koleksionuesit e maskave, ndërgjegjësim për pastërti duke mbledhur maska në rrugë nga Marseja në Paris

Kur maskat janë kthyer në aksesorin kryesor të të gjithëve, dy qytetarë kanë zgjedhur t’i koleksionojnë ato.

Një prej tyre quhet “kërmilli anglez” dhe tjetri “derri i Marsejës”. Së bashku, Edmund Platt dhe Frédéric Munsch janë duke ecur nga Marseja në Paris dhe duke mbledhur mijëra maska të hedhura gjatë rrugës, si dhe shishe plastike dhe mbeturina të ushqimit të shpejtë. Ata e quajnë misionin e tyre “Déchet par jour” (një copë mbeturine në ditë) dhe qëllimi është që të mbrojnë mjedisin duke demaskuar ata që janë të shkujdesur.

Deri më tani dy miqtë kanë mbledhur mbi 4500 maska.

“Është e padurueshme, maskat në tokë, bishtat e cigareve në tokë, McDonald’s në tokë, kanaçe, shishe. Ne jemi para një shkolle,” – tha Edmund Platt teksa qëndronte para ambienteve të një shkolle ku gjendeshin të gjitha mbeturinat që ai përmendi.

Ata thonë se e kuptojnë kur i afrohen një qyteti, kur shohin grumbuj maskash të cilat janë bërë simbol i ditëve tona.

Platt dhe Munsch shprehen se sa herë që mblidhni një copë mbeturine, është sikur të përqafoheni dhe merrni pakëz lumturi në planet.

Pasi të kenë ecur 880 km duke mbledhur maska në rrugë dyshja nga Marseja këtë të shtunë pritet të mbërrijë në Paris.