Sistemi shëndetësor në Greqi në grevë, mjekë e infermierë kërkojnë kushte më të mira pune

Punonjësit e sistemit shëndetësor në Greqi mbajtën një grevë ditën e enjte në mbarë vendin, në shenjë proteste për kushte më të mira pune gjatë pandemisë së koronavirusit.

Doktorë, infermierë dhe punonjës të tjerë të sektorit u mblodhën jashtë spitaleve dhe Ministrisë së Shëndetësisë për të kërkuar mbrojtjen e vendit të punës, rritjen e rrogave dhe zgjerimin e stafit shëndetësor për të luftuar COVID-19.

“Spitalet po vuajnë. Kemi qindra kolegë që po infektohen nga virusi. Në spitalin tonë patëm javën e kaluar 100 punonjës që hynë në karantinë, nga të cilët 30 dolën të infektuar”, u shpreh doktor Ilias Sioras, drejtor spitali në Athinë.

Vala e dytë e pandemisë ka vënë nën presion sistemin shëndetësor të Greqisë. Shtretërit në repartet e terapisë intensive në veri të vendit janë thuajse të mbushur.

Spitaleve private dhe atyre ushtarake u është kërkuar të marrin pacientë, ndërsa është kërkuar edhe ndërhyrja e punonjësve të sektorit privat.

Pas bllokadës dymujore të vendosur në mars, një rritje e rasteve me coronavirusit që prej tetorit detyroi qeverinë të vendoste një bllokadë të dytë, që pritej të mbaronte në fund të muajit, por që është zgjatur deri më 7 dhjetor.

Protesta e punonjësve të shëndetësisë u mbajt paralelisht me greva të përgjithshme 24-orëshe të punonjësve të sektorëve të tjerë publikë.

Disa mijëra persona marshuan në Athinë, pavarësisht kufizimeve që ndalojnë grumbullimet publike.