Pandemia, Brataj: Jemi te skenari 3, nëse ezaurohen spitalet rajonale, do i asistojmë qytetarët edhe në stadium

Kreu i Urgjencës Kombëtare, Skënder Brataj në një video të publikuar nga kryeministri Edi Rama në Facebook, ku u shfaqën pamje nga Urgjenca Kombëtare, foli për skenarët e mundshëm të COVID-19.

Brataj theksoi se aktualisht jemi tek skenari 3, por nëse ezaurohen edhe spitalet rajonale qytetarët e infektuar do asistohen edhe në stadiume.

“Për fat më mirë nuk kemi ezaurim të kapaciteteve. Thamë që jemi tek skenari 3, do të hapet COVID4, do të hapen spitalet rajonale, e skenarë të ndryshëm. Kur t’i mbushim të gjitha, do i trajtojmë edhe në ambulancë, edhe në shtëpi, edhe në hotele, edhe në korridore, por edhe në stadiume siç e bën edhe gjithë bota. Qytetarët do asistohen me çdo mënyrë, qëllimet e tjera jashtë aspektit shëndetësor, duhet vetëm të heshtin”, u shpreh Skënder Brataj.

Ndërkohë në Shqipëri rëndohet çdo ditë edhe më shumë bilanci i COVID19.

Gjashtëmbëdhjetë pacientë të tjerë me COVID-19 humbën jetën në ditën e djeshme. Ministria e Shëndetësisë tha se viktimat e radhës ishin të moshave 49-86 vjeç nga Tirana, Fieri, Berati, Shkodra, Lezha, Gjirokastra, Kuçova dhe Përmeti.

Po kështu, rezultuan të infektuar edhe 545 qytetarë të tjerë. 

Lexoni gjithashtu:

COVID-19 në Shqipëri, bien rastet e reja, por vijon prirja e lartë e numrit të vdekjeve