Arqipeshkvi i Tiranë-Durrës George Frendo mposht Covid-19

Arqipeshkvi i Tiranës dhe Durrësit, dhe njëherësh Presidenti i Konferencës Ipeshkvore të Shqipërisë George Frendo ka fituar betejën me COVID-19.

Lajmi është bërë i ditur nga vetë imzot Frendo përmes një shënimi në faqen zyrtare në “Facebook”.

“Falënderoj Zotin se së shpejti do të jem përsëri me grigjen time. Larg grigjes jam ndjerë si kokë pa trup. Gëzohem se mund të vazhdoj të kremtoj kohën e Ardhjes, në përgatitje për Krishtlindjen, bashkë me popullin tim.  Kjo periudhë ka qenë për mua një eksperiencë e dhimbshme. Megjithatë jam ndjerë më afër Jezusit, i cili, nga dashuria e tij për ne, ka pranuar dhimbje për shelbimin tonë. Dhe jam ndjerë më afër atyre që, në këto ditë, po vuajnë nga e njëjta sëmundje. Zoti ti forcoftë e ti shëroftë”, shkruan Arqipeshkvi Frendo.

Mes rreshtash, Arqipeshkvi ka falënderuar strukturat shëndetësore të spitalit, veçanërisht ato të “Shefqet Ndroqi” për kujdesin e treguar ndaj tij.

“Falënderoj përzemërsisht të gjithë ata që më kanë qenë pranë që në fillimin e kësaj sëmundjeje, veçanërisht bashkëpuntorët e mi më të ngushtë dhe gjithashtu falënderoj për shërbimin e parë që kam marrë nga strukturat e shërbimit Shëndetësor në vend, veçanërisht në Spitalin “Shefqet Ndroqi”, thekson ai.

Në mesazhin e tij nuk munguan përshëndetjet për besimtarët, por as për një pjesë të politikanëve shqiptarë, të cilët i kanë uruar shërim të shpejtë Arqipeshkvit të Tiranës dhe Durrësit, George Frendo.

Ai u shtrua në spital më 12 nëntor, ndërsa sot përcolli mesazhin e triumfit mbi virusin Sars Cov-2, duke shkruar këto fjalë: “shpresoj të kremtoj meshën me popullin në Katedrale të dielën me 6 dhjetor. Ju përshëndes përzemërsisht duke ju kujtuar të gjithëve gjithmonë në lutjen time”.