Napoli mposht Romën, derbi Chelsea-Tottenham mbyllet në barazim, humbet Arsenali

Napoli arriti një fitore të rëndësishme përballë Romës ne javën e 9 të Serie-A.

Napolitanët arritën të triumfonin në shifrat 4-0. Verdhekuqtë me disa mungesa, sidomos në repartin e mbrojtjes, e kishin të vështirë të rezistonin përballë skuadrës së drejtuar nga Gennaro Gattuso.

Një sukses ky që i dedikohet Diego Maradonës, i cili u nda nga jeta disa ditë më parë.

Në nder të legjendës argjentinase edhe stadiumi i Napolit tashmë do marrë emrin e tij.

Ndërkohë që në Premier-League, Arsenali vijon të mos ruajë një ritëm konstant në rezultate. Londinezët u mposhtën 1-2 në shtëpi nga Wolverhampton, kjo e fundit luajti nën ankth pas një lëndimi të rëndë që pësoi Raul Jimenez.

Futbollisti meksikan humbi vetëdijen pasi u përplas kokë më kokë me brazilianin David Luiz dhe u dërgua me urgjencë në spital. Ndeshja u ndal 10 minuta për t’i ardhur atij në ndihmë, ndërsa pak më vonë u raportua se ai ishte ardhur në vete.

Pas kësaj humbejeje, Arsenali shënoi nisjen më të keqe të sezonit në 39 vitet e fundit.

Përfundoi në barazim 0-0 derbi  mes Chelseat dhe Totenham. Një ndeshje që prodhoi spektakël dhe emocione por jo gola.

Nga ky barazim përfiton Liverpool që mban vendin e parë së bashku me Tottenham në kuotën e 21 pikëve.  

Spursat e Jose Mourinhos i kanë bërë një nisje shumë të mirë kampionatit pasi në 10 javët e para  kanë pësuar vetëm 1 humbje dhe me sa duket do jenë mes pretendentëve për titull edhe pse është akoma herët për të folur pasi në Premier Leagua renditja ndryshon sa hap e mbyll sytë.