Tërhiqet qeveria franceze, shumica parlamentare anulon ligjin për policinë

Qeveria franceze ka vendosur të pezullojë dhe rishkruajë një pjesë të ligjit të ri për sigurinë, që ka shkaktuar protesta në mbarë vendin.

Njoftimi erdhi nga grupet parlamentare që përfaqësojnë partinë e presidentit Emmanuel Macron, La Republique en Marche.

Ajo pjesë e ligjit, e njohur si “Neni 24”, parashikonte kthimin në krim të filmimit dhe identifikimit të oficerëve të policisë online.

Tani, qeveria do të propozojë një nen tërësisht të rishkruar, deklaroi kreu i grupit parlamentar të LREM, Christophe Castaner në një konferencë shtypi.

Neni i kontestuar u kthye në qendër të vëmendjes javën e kaluar, pas një incidenti ku ishin përfshirë oficerë të policisë së Parisit.

Oficerët u filmuan nga një kamera duke dhunuar një producent muzike me ngjyrë, me pamjet që u publikuan në internet dhe u vëzhguan nga miliona përdorues, duke shkaktuar një skandal kombëtar. Ndaj agjentëve është ngritur akuzë.

Po javën e kaluar, policia u kritikua për dorën e hekurt të përdorur në spastrimin e një kampi emigrantësh në qendër të Parisit, ku u verifikuan skena dhune dhe kaotike.