BQE rrit normat e interesit, Lagarde: Perspektiva e inflacionit, e lartë dhe e gjatë

Banka Qendrore Evropiane ka rritur edhe njëherë normat e interesit. Instituti që kujdeset për stabilitetin e çmimeve në zonën euro ka vendosur të vazhdojë aplikimin e medikamenteve për të luftuar një sëmundje të padukshme që po gërryen xhepat e miliona evropianëve.

“Perspektiva e inflacionit vazhdon të jetë shumë e lartë dhe do të jetë e tillë për shumë kohë. Përballë presioneve inflacioniste, Këshilli Qeverisës vendosi të rrisë tre normat kyçe të interesit me 25 pikë bazë”, tha Christine Lagarde, presidente e BQE-së.

Bëhet fjalë për një çerek pike që ngre normat e interesit në 3.75%, me qëllim frenimin e inflacionit vjetor, që në prill u rrit sërish në 7%. Objektivi i Bankës Qendrore Evropiane është një inflacion prej 2 për qind, në mënyrë që normat e reja të shfuqizohen jo pas shumë kohësh.