Tre ish-presidentët e SHBA-Së, pranojnë të bëjnë vaksinën e COVID-19 publikisht

Tre ish-presidentët e SHBA-së Barack Obama, Bill Clinton dhe George W.Bush kanë deklaruar se do ta bëjnë vaksinën e coronavirus publikisht, por edhe në televizion, që tu tregojnë qytetarëve amerikanë rëndësinë e vaksinimit.

Barack Obama është shprehur se i beson fjalëve të Dr. Fauci duke thënë se: “Do ta bëj vaksinën kundër Covid-19, dhe mund ta bëj në TV, ose ta filmoj në mënyrë që njerëzit të dinë që i besoj shkencës.” – në një intërvistë te “The Joe Madison Show”.

Freddy Ford, zëdhënësi i George W.Bush, deklaroi se ish-presidenti  kishte kontaktuar me Dr. Anthony Fauci, i cili mban postin e drejtorit të Institutit Kombëtar të Alergjisë dhe Sëmundjeve Infektive në SHBA, për të ofruar kontributin e tij në promovimin e vaksinës.

Gjithashtu edhe zëdhënësi i ish-presidentit Bill Clinton, Angel Urena, ka folur për këtë çështje duke u shprehur se ish-presidenti Clinton patjetër që do ta bëje vaksinën sa më shpejt që të jetë në dispozicion, bazuar në përparësitë e përcaktuara nga zyrtarët e shëndetit publik.

Madje ai ka thënë se do ta bëjë atë në një mjedis publik për të nxitur të gjithë amerikanët të bëjnë të njejtën gjë, si ai.