Ndarja nga jeta e Marko Bellos, Petro Koçi: Dhimbje e madhe, ishte vetvetja në politikë

“Një dhimbje e madhe”. Kështu është shprehur për Euronews Albania, zv. ministri i Mbrojtjes Petro Koçi për lajmin e trishtë të ndarjes nga jeta të ish-deputetit socialist, Marko Bello.

“E para është një humbje shumë dekurajuese. COVID si një pandemi që po korr jetë njerëzisht kuptohet që e krijon këtë situatën e dëshpërimit.

Kur njerëzit i njeh më nga afër kuptohet që efekti dëshpërues është më i madh. Kështu ka nisur edhe dita sot për ne, me një dhimbje të madhe për lajmin që morëm për humbjen e jetës së Markos.

Markon e kam njohur që në shkollën e mesme dhe shkollën e lartë të Gjuhëve të Huaja. Fati e deshi që më vonë të njiheshim për shkak të politikës. Marko u integrua shumë herë në strukturat e PS-së, ka qenë ambasador, ministër, zv/ministrës. Dua ta kujtoj gjithmonë atë me imazhin e një buzëqeshje pafund. Pavarësisht nga situata dinte të jepte mesazhet e optimizmit”, u shpreh Koçi.

Ai tregoi se Marko Bello ishte një patriot i madh dhe një demonstrim i vlerave qytetare dhe njerëzore në politikë.

“Në fakt kemi kohë pa u takuar. Unë me thënë të drejtën jam shumë i ngarkuar me punë, për shkak të angazhimeve politike.  Marko ishte një patriot i madh, nuk ishte thjesht një politikan, ishte edhe një qytetar. Marko ishte një shembull, ishte një demonstrim i vlerave qytetare dhe njerëzore në politikë”, u shpreh ai.

“Politikanët e mirë janë të gjitha ata që kanë pengje në jetën politike. Marko ishte dhe mbeti vetvetja në politikë”, theksoi z.Koçi më tej.

Marko Bello u nda nga jeta pas ndërlikimeve të shkaktuara nga infektimi prej COVID-19.

Mësohet se Bello, 59 vjeç, ka ndërruar jetë në një spital në Turqi ku po merrte mjekim më të specializuar.

Lexoni gjithashtu:

Ndahet nga jeta ish-deputeti i Partisë Socialiste Marko Bello