Vaksina anti-COVID, Manastirliu: Kemi bërë parapagimin prej 3.9 mln dollarë, do ta sigurojmë në kohë

Ministrja e Shëndetësisë dhe Mbrojtjes SocialeOgerta Manastirliu, në konferencën me gazetarët ka deklaruar se qeveria shqiptare është në proces negocimi me disa kompani për të siguruar në kohë vaksinën anti-COVID.

Ministrja theksoi se qeveria ka bërë një parapagim prej 3.9 milionë dollarë për të mundësuar sa më shpejt të jetë e mundur vaksinën anti-COVID. 

“Më lejoni që të them që qeveria shqiptare që në krye të herës është angazhuar në disa drejtime për të siguruar në kohë dhe për të pasur akses në vaksinën e sigurt, efektive, në momentin që ajo të bëhet e disponueshme.

Aktualisht ne kemi realizuar disa hapa. Hapi kryesor është nëpërmjet angazhimit direkt dhe financiarisht me instrumentin e Covax. Është bërë tashmë parapagimi në vlerën 3.9 milionë dollarë për të mundësuar në momentin më të parë që të jetë e mundur.

Shqipëria duke bërë këtë parapagim është përfshirë në dritaren e parë të negociatave për të aksesuar vaksinën” u përgjigj Manastirliu.

Manastirliu gjithashtu shtoi se Shqipëri është duke vlerësuar paralelisht dhe marrëveshjet me disa vende të tjera përveç përmes strukturave të BE-së.

“Paralelisht jemi duke vlerësuar në disa drejtime qoftë përmes shteteve të Bashimit Europian, edhe në mënyrë të drejtpërdrejtë me ta, mundësinë për të aksesuar vaksinën e disponueshme edhe nëpërmjet strukturave të BE, por edhe nëpërmjet vetë vendeve të BE, në funksion të aksesit të sigurt të vaksinës”, tha Manastirliu.

Lexoni gjithashtu:

Nga 6 dhjetori nisin testet e shpejta për COVID-19, gati 100 mijë kite