Ndahet nga jeta presidenti i Fax News, Kasem Hysenbelliu

Ndahet nga jeta Kasem Hysenbelliu, presidenti i medias  “Fax News”.

Hysenbenlliu ndodhej në Turqi prej disa ditësh ku po merrte trajtim mjekësor por për fat të keq, nuk mundi të fitojë betejën me COVID19.

Ai u nda nga jeta në moshën 59-vjeçare.

Hysenbelliu është themeluesi i Fax News dhe Faxweb.al, grupit mediatik që hyri në treg në vitin 2017, ndërsa më herët ka drejtuar News24, Panorama Group dhe Balkanweb.

Vdekja e Kasem Hysenbelliut ka qenë një lajm i trishtë, për gazetarët, miqtë dhe familjarët e tij. 

Nuk ka munguar një mesazh ngushëllimi nga kryetari i Partisë Demokratike, Lulzim Basha. 

Ky i fundit në një postimi në Facebook shprehet se lajmi është tronditës dhe ka shkaktuar shumë dhimbje. 

“Jam i hidhëruar nga lajmi tonditës për ndarjen nga jeta të Kasem Hysenbelliut, një qytetar i angazhuar dhe luftëtar i medias së lirë. Ngushëllimet e mia më të ndjera familjes Hysenbelliu për këtë humbje të rëndë! Lutjet dhe mendimet e mia janë sot me ta, si dhe me miqtë, kolegët dhe ekipin e televizionit Fax News.

Për ne që e kemi njohur personalisht, Kasemi do të mbetet shembulli i njeriut kurajoz, të sinqertë dhe të drejtpërdrejtë dhe një përkrahës i të drejtës dhe të vërtetës. Ai do të kujtohet si një ndër kontributorët e spikatur në fushën e medias, themelues dhe president i televizionit Fax News, administrator i gazetës më të madhe në vend “Panorama” dhe i televizionit “News24”.

Trishtimi dhe dhimbja janë të mëdha për këtë humbje tragjike. U prehtë në paqe!”, shkruan Basha.