Raporti i Parlamentit Europian: 4 kërcënimet kryesore për dezinformimin në Ballkanin Perëndimor

Studimi për Ballkanin Perëndimor tregon se dezinformimi është një endemi dhe pjesë e kudondodhur e politikës në rajon, pa përjashtim. Por teksa dezinformimi shpesh diskutohet në kontekstin e kërcënimeve të jashtme ndaj funksionimit të qeverisjes dhe demokracisë, studimi tregon se aktorët e jashtëm nuk janë fajtorët parësorë. Shumica e njerëzve dhe organizatave që prodhojnë dhe përhapin dezinformim janë të brendshëm.

Ky studim tregon se dezinformimi është një simptomë më shumë se shkak, i një thyerje më të thellë të kohezionit social dhe qeverisjes demokratike. Në vende si Serbia dhe Mali i Zi, ku politika mbizotërohet nga një grup i vetëm, dezinformimi ka tendencën të ndjekë “linjën e partisë”, duke i shërbyer interesave të pushtetit dhe duke minuar zërin opozitar.

Në ambiente politike më konkurruese, si Shqipëria, Kosova dhe Maqedonia e Veriut deri në një pikë, dezinformimi përdoret në mënyrë oportuniste nga të gjitha palët, për përfitime afatshkurtra më shumë se për strategji afatgjata.

Prezenca e ndarjeve të thella etnike, si në Bosnje Hercegovinë dhe Maqedoninë e Veriut ushqen fushata dezinformimi ksenofob, nga aktorë të brendshëm dhe të jashtëm.

Edhe pandemia e COVID-19 siguroi baza për dezinformim, pasi qeveritë në Ballkanin Perëndimor janë munduar të shtrembërojnë të dhënat e tyre për menaxhimin e pandemisë, ndërsa të tjerë kanë injektuar pretendime të rreme diku tjetër.

Sipas studimit, janë 4 kërcënime kryesore për dezinformimin në rajon: politika gjeostrategjike e Rusisë, e Shteteve të Bashkuara, pandemia e COVID-19 dhe pasojat e saj si dhe mungesa e zgjerimit të BE-së që ka ulur presionin te qeveritë rajonale për të përmirësuar cilësinë e udhëheqjes dhe zbatimin e praktikave demokratike.