Vrasja e gazetarit sllovak, gjykata shpall të pafajshëm biznesmenin

Një gjykatë në Sllovaki ka shpallur të pafajshëm biznesmenin miliarder Marian Koçner nga akuza e komplotit për vrasjen e gazetarit Jan Kuçiak, në shkurt të vitit 2018.

Megjithatë, gjykata e distriktit Pezinok dënoi bashkëpunëtoren e tij Alena Zuzava për planifikimin dhe urdhërimin e vrasjes me 25 vjet burg.

Më herët, dyshja ishte shpallur e pafajshme në gjyqin fillestar që nisi në 2019-n dhe vendimi i së premtes vjen pas një apeli të bërë në 2021-shin. Tani, palëve u mbetet mundësia që ta kundërshtojnë vendimin në Gjykatën e Lartë.

Vrasja e Kuçiak ishte ndër më tronditëset që bëhej në radhët e gazetarëve në vitet e fundit, pas asaj të gazetares malteze Dafne Karuana Galicia.

Të dy ata u vunë në shënjestër pasi po ekspozonin lidhjet mes zyrtarëve të qeverisë dhe organizatave kriminale.

Kuçiak ishte më i riu në moshë. Ai dhe e fejuara Martina Kushnirova ishin 27 vjeç kur u ekzekutuan nga një ish-ushtarak i forcave speciale sllovake.

Asokohe, reporteri po shkruante për lidhjet e qeverisë sllovake dhe disa biznesmenëve me grupit mafioz Ndrangheta dhe ekzekutimi i tij shkaktoi zemërim popullor, aq sa kryeministri i atëhershëm sllovak, Robert Fico u detyrua të jepte dorëheqjen bashkë me një numër të lartë zyrtarësh të tjerë.

Duke qenë se në vrasje u përfshi kriminaliteti ndërkufitar, ajo u hetua edhe nga FBI, Skotland Jard, Europol, policia italiane dhe ajo çeke, që u bashkuan me hetuesit sllovakë.

LEXONI GJITHASHTU:

• Vrasja e gazetarit sllovak, Gjykata e Lartë zhbën pafajësinë e porositësve, çështja kthehet për rishqyrtim
• Vrasja e gazetarit disident, publikohet raporti amerikan që përfshin princin saudit në ekzekutim