Vjosa Osmani-Mimi Kodhelit: Kuvendi i Shqipërisë të miratojë një rezolutë që dënon gjenocidin serb

Anëtarët e Komisionit për Punë të Jashtme dhe Diasporë në Kuvendin e Kosovës, kanë kërkuar nga delegacioni nga Shqipëria të udhëhequr nga deputetja Mimi Kodheli, që të angazhohet që Kuvendi i Shqipërisë të miratojë një rezolutë nëpërmjet së cilës dënohet gjenocidi i shtetit serb.

Kryetarja e Kuvendit dhe ushtruesja e detyrës së Presidentit, Vjosa Osmani, si dhe nënkryetarja e Kuvendit, Arbërie Nagavci, i kërkojnë deputetes Mimi Kodheli dhe Komisionit për Punë të Jashtme të Kuvendit të Shqipërisë, që Kuvendi i Shqipërisë të miratojë rezolutën mbi gjenocidin serb të kryer ndaj shqiptarëve të Kosovës.

Nga ana e saj deputetja Mimi Kodheli ka kërkuar koordinim më të madh përballë sfidave të reja, duke e pranuar faktin se Shqipëria, sikurse edhe Kosova nuk ka bërë aq sa duhet për zbardhjen e gjenocidit serb.

“Bashkë do të bëjmë shumë më shumë se sa deri dje. Kur ne jemi të ndarë, të tjerët janë shumë të fortë”, ka thënë Kodheli, duke shtuar se lufta e UÇK-së ka qenë e drejtë dhe e pastër. 

Ndër tjerash, ajo ka premtuar se do të jetë një zë i fuqishëm i Kosovës.