Shefi i “Wagner” premton kalimin e kontrollit tek ushtria ruse

Shefi i grupit të mercenarëve “Wagner” është zotuar se do t’ia kalojë kontrollin e qytetit të Bakhmutit ushtrisë ruse brenda 1 qershorit.

Themeluesi i kompanisë ushtarake private, Jevgjeni Prigozhin deklaroi se trupat e tij e kanë marrë nën kontroll qytetin që prej së shtunës, por pala ukrainase e hedh poshtë lajmin.

“Bakhmuti është i shkatërruar, por jo i pushtuar”, kanë deklaruar zyrtarë nga Kievi, të cilët pretendojnë se njësitë ruse po avancojnë vetëm në rrethinat e Bakhmutit.

Por Prigozhin ka vazhduar të insistojë se do t’ia dorëzojë qytetin ushtrisë ruse të enjten e ardhshme. “Wagner” do të largohet nga Artemovski nga 25 maji deri më 1 qershor”, deklaroi Prigozhin në një mesazh audio të regjistruar në rrjetin “Telegram”.

Bakhmuti njihej më parë si Artemovsk, në nder të revolucionarit sovjetik, përpara se ukrainasit ta riemëronin.

Në vijim të njoftimit të tij, Prigozhin tha se mercenarët e tij kanë ngritur “vija mbrojtëse” në perëndim të qytetit, në prag të transferimit të kontrollit.

Por zëvendës ministrja ukrainase e Mbrojtjes, Hanna Maliar ritheksoi se trupat pushtuese kanë vetëm një pjesë të vogël brenda qytetit dhe se intensiteti i lëvizjes së tyre është reduktuar.

Sipas saj, trupat ukrainase vazhdojnë të kontrollojnë impiante private me rëndësi strategjike në zonën e Litakut, të qytetit.

Analistët thonë se Bakhmuti ka pak rëndësi strategjike për Moskën, por kapja e tij do të ishte një fitore simbolike për Rusinë pas betejës më të gjatë që ka zhvilluar deri më tani në Ukrainë.

LEXONI GJITHASHTU: 

• Çështja Beleri, Dendias dhe Xhaçka takim “kokë më kokë” në Bruksel
• Dendias reagon për Belerin nga Këshilli i Punëve të Jashtme të BE-së