SHBA: Duhen marrë masa ndaj Rusisë lidhur me armët kimike

Fuqitë perëndimore po shqyrtojnë ndërmarrjen e masave ndaj Rusisë përmes trupit botëror të armëve kimike, lidhur me sulmet e supozuara me agjentë nervorë, tha ambasadori amerikan në Organizatën për Parandalimin e Armëve Kimike.

I dërguari i SHBA-së në këtë organizatë, Joseph Manson, e fajësoi Moskën për dështimin që kjo organizatë javën e kaluar të arrite pajtim për një udhërrëfyes të ri për pesë vjetët e ardhshme.

Tensionet në Organizatën për Parandalimin e Armëve Kimike janë rritur pasi hetuesit gjetën se agjenti nervor i epokës sovjetike, Noviçok, ishte përdorur kundër kundërshtarit të Kremlinit, Aleksei Navalny në Rusi më 2020, dhe ndaj një ish-spiuni rus në Angli më 2018.

“Shtetet e Bashkuara dhe shumë shtete të tjera janë të shqetësuara me mosrespektimin nga Rusia, dhe ky mosrespektim rus është në qendër të problemeve në Organizatën për Parandalimin e Armëve Kimike”, tha Manso për AFP-në.

“Ne do të vazhdojmë të shikojmë se cilat janë mjetet e duhura për të bërë që Rusia të respektojë rregullat”, shtoi ai.

I pyetur nëse po shqyrtohet edhe mundësia që Moskës t’i pezullohet e drejta e votimit në Organizatën për Parandalimin e Armëve Kimike – një sanksion që u përdor ndaj Qeverisë siriane më 2021 për shkak të përdorimit të armëve kimike gjatë luftës civile – Manso tha se “nuk do të përmend asgjë specifike, por nuk do të përjashtoj asgjë në mënyrë specifike”.

Gjatë takimit të javës së kaluar, shtetet anëtare të Organizatës për Parandalimin e Armëve Kimike tha se ka përparim sa i përket marrëveshjes së armëve kimike të vitit 1997, por Rusia akuzoi Perëndimin se po e politizon këtë politikë që synon eliminimin e armëve të tilla.

Takimi përfundoi pa marrëveshje për një dokument final që do të vendoste prioritetet e organizatës për pesë vjetët e ardhshëm.

LEXONI GJITHASHTU:

• Dule: Si po tentohet t’i hiqet Fredi Belerit mandati i kryebashkiakut të Himarës
• Protestuesja kundër luftës mbulohet me “gjak” në tapetin e kuq të Kanës