Shkëmbim zjarri në kufirin Kosovë-Shqipëri, qëllohen me armë policët, 6 të arrestuar

Një incident është regjistruar mëngjesin e ditës së sotme në Morinë, pikërisht në kufirin Kosovë-Shqipëri ku ka pasur shkëmbim me armë zjarri mes disa shtetasve të huaja dhe efektivëve të policisë.

Policia bën me dije se në pranga kanë rënë 6 shtetas sirianë dhe një tjetër është shpallur në kërkim pasi tentuan të kalonin në mënyrë të paligjshme emigrantë drejt vendeve të treta, si dhe qëlluan me armë zjarri drejt efektivëve në tentativë për t’u shpëtuar këtyre të fundit nga arrestimi.

“Në fshatin Morinë, në kufirin e gjelbër me Kosovën, shërbimet e Policisë kanë lokalizuar grupin e shtetasve të huaj që ushtronte veprimtarinë kriminale të dhënies ndihmë emigrantëve nga vendet e treta, për kalim të paligjshëm të kufirit. Shërbimet e Policisë iu kanë bërë thirrje këtyre shtetasve, që të ndalojnë, por disa prej tyre kanë hapur zjarr në drejtim të punonjësve të Policisë duke rrezikuar seriozisht jetën e punonjësve të Policisë”- thuhet në njoftim.

Konkretisht në kuadër të operacionit ‘Strukturimi’ kanë rënë në pranga shtetasit A. B., 27 vjeç, me shtetësi algjeriane, si dhe M. N., 25 vjeç, N. A., 20 vjeç, M. Sh., 21 vjeç,  M. R., 20 vjeç dhe R. L., 40 vjeç, të pestë me shtetësi siriane.

Ata akuzohen për veprat penale “Vrasja e punonjësve të Policisë së Shtetit”, mbetur në tentativë, kryer në bashkëpunim, “Prodhimi dhe mbajtja pa leje e armëve, armëve shpërthyese dhe municionit” dhe “Ndihma për kalim të paligjshëm të kufijve”, shtetasit :

Gjithashtu, në kuadër të këtij operacioni, u shpall në kërkim shtetasi S. G., 27 vjeç, me shtetësi algjeriane.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.

LEXONI GJITHASHTU: 

• Përdorte biznesin privat si pikë për shitjen e kokainës, në pranga i “forti” në Fier
• Mbytet anija me emigrantë në Mykonos, humbin jetën 3 persona