Vrasja e të riut Klodian Rasha shkakton protesta në Korçë, plagoset shefi i rendit dhe tre policë

Vrasja e të riut 25-vjeçar Klodian Rasha ka shkaktuar zemërim dhe këtë e dëshmojnë protestat e organizuara në disa qytete të vendit. Në qytetin e Korçës aktualisht raportohet për një tension mes qytetarëve dhe forcave të Policisë.

Gazetari i Euronews Albania Xhensil Shkëmbi ka sjellë disa pamje, të cilat dëshmojnë se qytetaret kanë goditur me sende të forta drejt bashkisë Korçë.

Efektivët e Policisë në përpjekje për të zmbrapsur protestuesit ka përdorur forcën, ndërkohë shihen forca të shumta, të cilat vrapojnë nëpër rrugica për të shpërndarë qytetarët.

Protestuesit kanë qëlluar me gurë dhe për pasojë ka mbetur i plagosur në pjesën e pasme të kokës shefi i rendit, Marigel Jacellari si dhe tre efektivë të tjerë të policisë.

“Ka pasur një ndjekje nga policia, disa persona janë shoqëruar në komisariat dhe disa prej tyre janë në dhomat e paraburgimit. Momentalisht situata është më e qetë dhe protestuesit janë shpërndarë. Ka një numër të madh policësh që qarkullojnë nëpër rrugë”, tha gazetari Shkëmbi.

Gazetari raporton gjithashtu se krahas gurëve, protestuesit, kryesisht një grup të rinjsh kanë hedhur sende të forta, flakadanë dhe hekura në drejtim të godinës së bashkisë Korçë, por fatmirësisht nuk raportohet për punonjës të plagosur.