Opinioni i ‘Venecias’, dy pikat që mund të ndryshohen në draftin final për Kodin Zgjedhor

Komisioni i Venecias shqyrtoi dhe miratoi sot kërkesën për opinion nga Presidenti Ilir Meta në lidhje me ndërhyrjen në Kodin Zgjedhor më 5 tetor si përshtatje e ndryshimeve kushtetuese që u votuan më 30 korrik.

Edhe pse opinioni final ende nuk është publikuar zyrtarisht nga Komisioni i Venecias, burime për Euronews Albania kanë treguar dy pikat e vetme që mund të ndryshojnë nga drafti që doli pak ditë më parë.

Bëhet fjalë për pikat ku përmendet neni 96 i Kushtetutës që trajton koalicionet parazgjedhore.

Ndërkohë, në opinionin final të Komisionit të Venecias pritet të mbeten të paprekura pikat ku thuhet se ndryshimet e bëra në Kodin Zgjedhor më 5 tetor ishin shumë të nxituara dhe mund të cenojnë parimet demokratike të procesit zgjedhor.

Gjithashtu, Komisioni nuk merr përsipër të trajtojë kushtetutshmërinë e ndryshimeve, sepse ato përcaktohen si kompetencë e Gjykatës Kushtetuese.

Kërkesa për opinion urgjent në lidhje me ndryshimet në Kodin Zgjedhor që u votuan më 5 tetor, Komisionit të Venecias iu dërgua nga Presidenti Meta në fund të muajit tetor, kur shpalli dekretin për rishqyrtimin e tyre.