​Kosova shton bashkëpunimin me shtetet e Vishegradit

Ministrja e Punëve të Jashtme dhe Diasporës, Meliza Haradinaj-Stublla, zhvilloi një video-konferencë të përbashkët me ambasadorët e grupit të Vishegradit (Poloni, Çeki, Sllovaki, Hungari), me të cilët diskutoi për Fondin e Ballkanit Perëndimor, planet për të ardhmen e tij, si dhe bashkëpunimin midis vendeve të Vishegradit dhe Ballkanit Perëndimor.

Ministrja tha se gjatë kryesimit të Republikës së Kosovës me Fondin e Ballkanit Perëndimor, në vitin 2019, është arritur që të mbahen të gjitha aktivitetet e planifikuara me pjesëmarrje të të gjitha shteteve të rajonit.

“Gjatë kryesimit të Kosovës me Fondin e Ballkanit Perëndimor është bërë edhe një hap shumë i rëndësishëm sa i përket të ardhmes së Fondit të Ballkanit Perëndimor. Ky hap ai ka të bëj me miratimin e Deklaratës së përbashkët nga ana e të gjithë ministrave të punëve të jashtme të rajonit përmes së cilës është vazhduar trendi i rritjes së kontributit vjetor si konfirmim i punës së shkëlqyeshme të bërë deri më tash në përmbushjen e misionit të Fondit të Ballkanit Perëndimor. Në anën tjetër, duke qenë se bashkëpunimi rajonal, i cili pa diskutim ka rezultate shumë të prekshme, shtysë kryesore e ka integrimin europian, është e domosdoshme që perspektiva e anëtarësimit të përkthehet në mesazhe e veprime konkrete edhe nga ana e BE-së”, u shpreh Haradinaj-Stublla.

Zonja Haradinaj-Stublla shtoi se bashkëpunimi rajonal nuk mund të bëhet qëllim në vetëvete, ndërsa shtoi se kjo dritare e re nuk mund të zëvendësojë procesin e integrimit të Ballkanit Perëndimor në BE.